Umuhimu wa uvumilivu katika uhusiano

163
Halima Mlacha, mwandishi wa maoni haya

KAMA unampenda kweli mpenzi wako ni wazi kuwa upendo wako wa dhati hautozingatia zaidi mahitaji yako bali ya mwenza uliye naye. Ni wazi kuwa migogoro kwenye uhusiano wowote ule ipo hasa pale wenza hao wasipopeana nafasi ya kusikilizana.

Vitu vinne ambavyo ni muhimu katika uhusiano wowote ni huruma inayotengeneza kujali, kumjua mwenza wako, kumheshimu, kuruhusu majadiliano na kubwa zaidi ni uelewa. Kila siku narejea hii hoja kuwa, hata kwenye uhusiano wa mapenzi lazima kutakuwepo na mikwaruzano ya hapa na pale jambo la msingi ni namna ya kushughulikia misuguano hiyo bila kuibua chuki na hatimaye kuvunja uhusiano.

Hata katika uhusiano wa kawaida, mikwaruzano na misuguano ni kama kukanyaga bomu, bila kuchukua tahadhari na kutegua bomu lenyewe, ukiondoa mguu mtu bomu hilo linalipuka na kuharibu kila kitu. Uvumilivu ndio jibu kubwa kwa wenza endapo itatokea kukwaruzana au kutoelewana.

Endapo mwenza wako amekuudhi na kukupandisha hasira jambo la msingi kabisa ni kuhakikisha unadhibiti hasira hizo. Jaribu kuelewa kwanza tatizo kabla hasira hazijakuathiri na kukutawala. Kumbuka kuwa hasira hasara na siku zote mtu mwenye hasira huzungumza na kufanya mambo ambayo baadaye hujikuta akijilaumu.

Unapotokea msuguano katika mapenzi epuka kuwa mzungumzaji na mlalamishi, kuwa mtulivu na tanguliza busara mbele kabla ya kutamka chochote kinywani kwako. Huo ndio msingi wa uvumilivu.

Katika hili, vitabu vingi vya uhusiano vinashauri kuwa endapo mwenza anaona hali na mazingira ya mazungumzo hairidhishi kutokana na ugomvi wenyewe ni bora kuahirisha mazungumzo hayo na kupanga muda mwingine wakati wote wawili wakiwa wametulia.

Chanzo: Habari Leo

Weka maoni